Rancag

Bapa Doblang pada terang
kumis baplang nuruban biwir nu jeding
pipi kemong irung mancung
panon buringas hérang
goréng omong gawang geuweung harung gampung
pantrang mayar kana hutang
licik sarta sok curaling

Hiji mangsa Bapa Doblang
weureu gadung kabebeng keur gulang-guling
jol nu nagih hutang sarung
gancang ngoréjat hudang
ngambek nyereng bari ngamang-ngamang pentung
Bapa Doblang leng ngoléang
labuh nyungkur biwir suwing

Tandak

Euleuh, itu Bapa Doblang
notorogan boro baé kumis baplang
puas nyorang weureu gadung
beuteung bebeng lieur lanjung humaregung
matak ogé hirup urang
entong bedang bedegong curaling
bisi kawas Bapa Doblang
wawalesna tisuksruk jeung suwing

Mana kalakuan urang
kudu bener ulah leuwih ulah kurang
sabab laku lampah urang
mawa jalan lara bagja nu disorang
usik malik beurang peuting
Gusti Alloh Nu Héman Nu Asih
ucap lampah haté wening
ciri jalma utama beresih

Rancag

Lambang R.I. jero ngandung harti
lamun bener diamalkeunana
persatuan tangtu témbong
teu cukup ku disebut
atawana apal na biwir
bhineka tunggal ika
maksudna gumulung
kabeh sélér-sélér bangsa
béda-béda tatapi asal sagetih
béda tapi saasal

Lambang R.I. jero ngandung harti
lamun bener diamalkeunana
persatuan tangtu témbong
teu cukup ku disebut
atawana apal na biwir
bhineka tunggal ika
maksudna gumulung
kabeh sélér-sélér bangsa
béda-béda tatapi asal sagetih
béda tapi saasal

Tandak

Hiji basa hiji bangsa
basa bangsa Indonésia
hiji bangsa hiji nusa
nusa tunggal nusantara
Sélér-sélér suku bangsa
ti wewengkon mana-mana
saka-suka saka duka
wujud bangsa Indonésia

Rancag

Harta pada naréangan
Harti pada nyararungsi
Sabab duanana guna
Harti bisa méré bukti
Harta pon kitu deui
Bisa ngabul nu dimaksud
Nedunan sakahayang
Tapi harta gampang leungit
Mungguh harti mangpaat dunya ahérat

Réa nu nampa warisan
Ngadak-ngadak sugih mukti
Salieuk béh hirup ngeunah
Senang ngahena-ngahening
Gawé ukur palesir
Duitna diawur-awur
Bandana beuki suda
Paingan ceuk Nini Aki
Najan gunung ditugaran tangtu cepak

Tandak

Harta pada naréangan
Harti pada narambahan
Harta harti sarua guna
Pada bisa méré bukti
Bisa hasil sapaneja
Sok nyumponan cita-cita
Harta harti sok mangpaat
Dapon diraksa taliti

Anu beunghar ku warisan
Ngadak-ngadak roroyalan
Lamun hirup kitu laku
Harta teu jadi mangpaat
Najan harta leuwih cukup
Teu dipaké modal hirup
Raja kaya nungtut ledis
Ahirna timbul musibah

Rancag

Coba teguh masing telek telik
Éta gambar éta gambar
Sugan nyaho Ujang Nyai
Sato naon reujeung di mana ayana

Nu kadua anéh aya ceuli
Nu gunana nu gunana
Béda ti ceuli nu galib
Ceuli naon tuduhkeun lebah gambarna

Nu katilu geura sidik-sidik
Digelungan digelungan
Ngarumbay lamun di cai
Musuh lauk di balong jeung di walungan

Tandak

Coba teguh masing telik
Éta gambar sidik-sidik
Sato naon kitu wanda
Reujeung di mana ayana

Nu kadua aya ceuli
Ceuli naon sing taliti
Ceuli béda ti biasa
Tuduhkeun dina gambarna

Rancag

Di mamana panjajah pada marudah
lantaran dikiritik
ku ahli nagara
yén éta lampah jahat
tatapi kalah mudigdig
ambek ambekan
dasar nu buta tuli

Beuki bengis adatna teu suda-suda
dasar nu kasar budi
ngagawékeun jalma
henteu jeung kira-kira
anu teu nurut dibui
nandang siksaan
kejem teu aya tanding

Tandak

Di mamana si panjajah
pada amarah marudak
manan kapok anggur gawok
najan dipoyok dirojok
nagri sabuana umumna nyarela
nyempad rosa politik panjajah
tapi nu ngajajah teu pasrah teu sadrah
terus meres ngahina ngarinah

Nu sarakah neuki nista
Adat kakurung ku iga
Ngerja bodo ka sasama
Nyokcrok nyeuseupan hasilna
Nasib nu dijajah seunggah susuh payah
Ringkus bangkol nandangan siksaan
Nu ngajajah kejem dipunjung dialem
Weureu seubeuh hirup roroyalan